الناس في بلدي يصنعون الحب ثغرهم بسام وكلامهم انغام وحين يتقابلون ينطقون بالسلام
....... قلتها بفخر لجاراتي وهن يسألني عن السودان ... تمثل امام الحي بأكمله والدنيا خريف والمطر (سارية تبقبق للصباح ما نفشت) ... واهل الحي يخرجون كل يحمل في يديه شئ لتصريف مياه وهذا عمنا عمر ينادي الاولاد ارح نطلع المويه من بيت ناس عمكم يونس ويجيه الرد هناك مجموعه فعلا مشت لهم ....... وتسمع صوت احمد اليماني وهو يقول ... اول شئ خلونا نصرف موية الشارع عشان ما ترجع ليهم .... احمد اليماني صاحب الدكان الفي الحي ... رغم انه يمني الا انه سودانيا كامل السودنه فتجده مع ناس الحي في الافراح والاتراح يده بيدهم ... عندما ينجح احد ابناء الحي اول (صندوق بارد) منه .... وكذلك في كل الافراح .. وفي الاتراح ( قدرة الفول ) حاضره .... احتضنوه اهل الحي بحب فكان اهلا له ..... وتبدء عملية التصريف والكل في جد واجتهاد ومزاح ومحبه
خالتي امنه المرأه ذات الحضور الجميل تطوف بيوت الحي بيتا بيتا تسأل ( كيفكم ونعل البيت ما صبا) ويجيها الرد من خالتي مريم الجميله وكانه ابوصلاح تغني لها حين قال( ديل شلوخا تلاته ومن تحت وسمين) ... ( الاوضه الورا ديك صبت لكن تاني مافي شئ ) وتمازحها ( نان ياختي تلقيهن الاتنين السماحه وسماحة البيت ) وتضحك خالتي مريم ضحكه ترد الروح وتقول ليها يسمح عملك وبعد دا السماحه شن بندوربها الله يدينا سماحة الكبر ويخرجنا منها مسلمين
وهذا عم محمد اكبر ناس الحي سنا واكثرهم حكمه يدخل الى داره بعد اطمئن على سير عملية التصريف مخاطبا اهل بيته ( نفيسه .. فاطمه اسرعن اعملن الفطور للرجال ديل وقت ما قدرت اجسر معاهم اقلاها نسوي ليهم الفطور) ..... نفيسه عوسي انا بعمل (الملاحات) .. يا علويه اعمل (شعيريه) وتبدء حركه دؤوبه في منزل عم محمد
وحاجه حليمه نادت بالحائط الفاصل بينها وبين جارتها محاسن .. يا محاسن بنياتي من امس عند ناس خالن وانا براي دحين انا بسوي القراصه وانتي اعملي التقليه عشان نفطر الرجال البجسروا ديل .. ويجيها الرد سمح ياختي هسي بعمله وديهو عثمان يجيبوا ليك بغادي عشان تملحي القراصه طوالي
ويسأل عم محمد الرجال ها ناس ما تقيفوا تفطروا ويجيه الرد من عم علي خلينا نخلص يا زول فد مره وبعداك نفطر
يجلسون للفطور حلقات اربع او خمس كل فئه عمريه مع بعض ولكنهم يتبادلون النكات والمزاح بكل احترام وحفظ للمقامات ... الحميمه والمحبه عنوانهم رغم انه من قبائل مختلفه ومناطق مختلفه يطبقون التكافل الاسلامي في ابهى صوره ولا فرق بين غنيهم وفقريهم ولا بين صاحب منصب وعامل الكل متوادد متراحم
وحينا ماهو الا صوره مصغره للسودان
انها بلدي التى لا تقول على من يقيم بها اجنبي ... الاجنبي في بلدي من كان اجنبي اللسان والدم .....
بلدي كل الحب
